PRI RUSIA E-MOVADO (5)

• S-ro XXX faris malbone, ke li okupis postenon de prezidento, havante
  nenian imagon pri siaj estontaj devoj, ne sentante respondecon, ne laborante
  per kapo. Kie estas liaj artikoloj? Kie estas liaj verkoj? Gvidanto de
  E-asocio devas esti ne vojaghisto kaj dancisto, sed verkisto, jhurnalisto,
  chiuflanke klera homo.

• Ju pli mi okupighas pri lingvo Esperanto, des pli vidas, kiom malsimpla ghi
  estas, kiom malfacile estas traduki en ghin. Elementnivele ni chiuj scias
  ghin, sed traduki komplikajn tekstojn povas ne chiu. Ankau mi ne. Plimulto
  da niaj aktivuloj scias Esperanton nur tiom, kiom sufichas por babili dum
  renkontighoj. Sed demandu ilin, kiel traduki "еж, резина, грузовик, печень"
  ktp ktp, kaj ili tuj serchas en vortaroj. Ricevi plej altan noton che CHALK
  oni povas ech fakte ne sciante la tutan lingvon. Jen la problemo. Tiu
  komisiono estas pura formalajho, absolute sen ia ajn utilo. Same kiel chiuj
  aliaj viaj komisionoj. La tuta "laboro" de REU shajnas al mi unu granda ludo
  kaj trompo. E-movado en Rusio vivas kaj evoluas, sed REU ekzistas tute
  aparte de ghi. REU ekzistas nur por siaj estroj, kiujn interesas nur sia
  propra gloro kaj amuzoj. Ne vane ili evitas uzi nacian lingvon. Ja ili ne
  havas kion diri al la popolo. Ili sentas sin komforte nur en sia propra
  sekteto. Chiu normala homo ne povas akcepti tian agadon kaj ofte senrevighas
  pri Esperanto. Kaj REU eterne restos kelkdekhoma grupeto, kie chiu konas
  chiujn. Vi povas diri: "Grishin chiam kritikas, sed kial li ne konsilas ion
  konkretan?" Konsili al vi ion konkretan estas senutile, same kiel konsili al
  blinduloj pentri belan bildon. Necesas shanghi la tutan estraron de REU.
  Nova estraro devas konsisti el homoj kapablaj, agemaj kaj sindonaj al
  Esperanto. Por komenco oni povus renaski ruslingvan chiumonatan revuon
  "Mejhdunarodnyj jazyk" (Internacia lingvo). Nenio malhelpas atingi kaj
  superi la nivelon de 20-30-aj jaroj, krom... malkapableco de niaj
  "gvidantoj". Sed ili ne povas kaj ne volas ekrigardi sin objektive kaj
  kritikeme. Regas abomeninda sinamo kaj malamo al kritikantoj. Ili ech ne
  partoprenas honestajn diskutojn kaj timas ilin. S-ro XXX, mi diras tion
  kun doloro, char mi amas Esperanton kaj volas ghian progreson. Mi povas
  erari pri diversaj aferoj kaj tiam vi korektu min, sed ghis nun chio, kion
  mi scias kaj ekscias chiutage pri REU, konvinkas min, ke ghi estas stulta
  organizajho (au konsistas el stultuloj, kio estas la samo). Kaj eble pro tio
  nek REU nek Esperanto estas popularaj en Rusio.

• (Pri pagataj E-kursoj de s-ano NNN)
  Se vi atente tralegis chi tiun leteron, vi devis kompreni, ke NNN
  produktas pseudoesperantistojn. Liaj lernantoj okupighas pri Esperanto ne
  pro beleco de la ideo pri internacia lingvo, sed nur pro praktikaj
  konsideroj. Nome, ili planas, elspezinte iomete da mono por E-instruisto,
  plene kompensi tion, senpage gastante che eksterlandaj esperantistoj.
  NNN alvokas rakonti ne pri homaranismo kaj aliaj altaj ideoj, sed
  chefe pri la Gastiga servo. Sed mi demandas, kiom longe la eksterlandaj
  esperantistoj volonte gastigos che si pseudo-samideanojn, kiuj lernis la
  lingvon sole por tio?? Ili ja disponigas hejmon kaj (ofte) manghon por
  sincere helpi al Samideanoj, chu ne? Evidente, la praktiko uzi Esperanton
  por persona profito pli au malpli frue pereigos la Gastigan servon. Kaj
  ghenerale, E-movado prosperos nur tiam, kiam ghi konsistos el Samideanoj.
  Necesas serchi Samideanojn, sed ne samlingvanojn. Kia utilo estos, se iuj
  egoismaj homoj ekparolos Esperante? Tio neniom pliproksimigos "la finan
  venkon"; ech kontraue, malproksimigos. Kaj se oni organizis firman E-klubon
  el Samideanoj, ili povas pli bone subteni la klubon, ol la
  "vojaghemuloj-gastemuloj". Instruado de la lingvo ne estas memcelo. Kaj ne
  necesas ankorau pli putrigi nian E-movadon, ghi sen tio jam estas putra.  :)
  Do, ne rapidu subteni tiun iniciaton. Veraj Esperantistoj farighas el tiuj
  homoj, kiuj volas helpi al la homaro, sed ne ricevi ion por si. Kaj tiaj
  noblaj homoj ekzistas kaj ekzistos chiam, nur necesas ilin bone serchi. Nur
  ili povas progresigi Esperanton (sed ne "haljavshchiki").

• Esperanto ne estas varo, kiun ni VENDAS. Ghi estas kvazau fajro, kiun ni
  transdonas de unu persono al alia. Certe, se iu volas pagi al instruisto,
  tiu pagu; sed ni povas konsideri tiun pagadon prefere kiel libervolan
  monhelpadon al E-movado...

• Provu ekrigardi la nuntempan "movadon" per okuloj de esperantistoj de
  komenco de XX-a jarcento. Chu niaj pioniroj povis imagi, ke dum cent jaroj
  esperantismo ne evoluos, sed kontraue tiel degeneros? Kaj chio chi okazis ne
  spontane, sed "dank' al" senlaca sektema agado de niaj lingvanoj-estraranoj.
  "Konkerinte" la E-movadon, ili panike timas kritikon kaj aranghas histerian
  kalumnian kampanjon kontrau chiu, kiu kuraghos atenci ilian regadon.

• Chiam necesas vidi diferencon inter Esperanto kaj esperantistoj. Se jughi
  pri Esperanto lau kelkaj esperantistoj, do vere necesas kuri de Esperanto
  kiel de fajrego. (Ghuste tiel kondutas eksteruloj, kiuj ja jughas pri
  Esperanto lau ghiaj "oficialaj" reprezentantoj)
  
  Esperanto estas pano kun mielo, kovrita de mushoj.
  
  Ebla eliro estas interreta prezento de origina esperantismo (kiu tre
  diferencas de nuna "movado"). Necesas enretigi ruslingve chiujn verkojn de
  Zamenhof. Necesas serchi kaj iel organizi ideanojn, sed ne lingvanojn.

• Ni rememoru 1887 kaj sekvantajn jarojn. Kiaj tendaroj tiam okazadis? Neniaj.
  Sed ghuste tiam aperis plej ideaj, plej konvinkitaj esperantistoj, kiuj
  formis la movadon. Ilin altiris ne shato al amuzoj, sed noblega ideo pri
  unuigo de la homaro en unu frata familio. Tendaroj jam ighis komenco de
  degenerado. Eble, M.B. pravas kaj homoj, partoprenintaj en tendaroj, pli
  ofte farighas "aktivaj" esperantistoj. Sed ofte ilia "aktiveco" estas
  malproksima de esperantismaj idealoj.
  En "Legendoj pri SEJM" oni povas legi pri tio, kiel finighis idea movado.
  Kaj mem estimata Bronshtejn kontribuis por tio. Li priskribis, kiel li
  junulo enuis dum seriozaj diskutoj de malnovaj E-veteranoj. Kaj li iniciatis
  junularan, pure amuzan E-movadon kun ludoj kaj dancoj. La veteranoj estis
  malkontentaj pri tio. Sed la maljunuloj mortis, kaj tiamaj junuloj, ech
  farighinte maljunuloj, ne plisaghighis, sed daure ludas infanajn ludojn.
  
  Rusia E-"movado" agonias. 100 partoprenantoj de E-kongreso por tuta Rusio -
  tio estas netolereble malmulte. (Mi rememoras BET-1987 en Saulaine, Latvio,
  kun 500 partoprenantoj) Kaj enhavo de la tuj okazonta RET ne estas serioza -
  chefe kantetoj, kantetoj... Diri kaj fari ion seriozan niaj "gvidantoj" ne
  intencas kaj ne kapablas. Ili mortigas Esperanton.

• Dum unuaj Universalaj Kongresoj oni parolis PRI internacia lingvo EN
  internacia lingvo.
  Dum nunaj tendaroj oni parolas EN internacia lingvo, sed pri diversaj
  bagateloj. Plimulton de nunaj esperantistoj internacia lingvo kiel globala
  problemo ech ne interesas. Oni kunvenas kiel amikoj nur por "etosumi".
  Tial min mem partopreno en tiaj tendaroj ne interesus, char min interesas
  internacia lingvo kiel problemo; mi ne shatas malplenan babiladon.
  Pro supre dirita kauzo ne plu eblas organizi kongresojn, kie oni parolus EN
  internacia lingvo PRI internacia lingvo.
  Mi estas konvinkita, ke por savi E-movadon necesas organizi kongresojn de
  nova tipo: EN NACIA LINGVO. En tiaj kongresoj oni parolu PRI internacia
  lingvo. Memkompreneble, tiaj kongresoj povos esti amasaj, partopreneblaj por
  "eksteruloj" kaj tre utilaj.
  Nunaj degenerintaj esperantistoj estas plej grava (eble, sola) malhelpo por
  popularigho de Esperanto. Multaj homoj interesighas pri la globala problemo
  de internacia lingvo, kaj ne estas malfacile igi amasojn favoraj al
  Esperanto; sed estas tre malfacile (au ne eble) restigi ilin favoraj al
  Esperanto post ilia senpera konatigho kun "reala E-movado".
  Chion tion mi skribis ankorau en "Konkordo" antau 12 jaroj, klarigante kial
  nia jhurnalo estas plejparte ruslingva. De post tiu tempo niaj esperantistoj
  nenion lernis, kaj Rusia E-movado kelkoble malpligrandighis...

• REU-estroj ne tre volonte invitas eksterlandanojn al siaj aranghoj.
  Rigardu liston de partoprenantoj de iu ajn Rusia E-tendaro. Kie estas
  okcidentanoj? Kie estas poloj, hungaroj, bulgaroj? REU-estraro ne invitas
  ilin. Rusiaj E-tendaroj ne estas internaciaj, kaj tial uzado de internacia
  lingvo estas praktike sensenca.

• Mi ofte skribas akre, char al mi mankas pacienco observi, kiel oni
  maltalente agadas. Tuta Rusia E-movado estas neserioza, infaneca. Se REU
  alinomi je "Junulara E-movado", tiam chio estus en normo. Sed ni bezonas
  alian, ne sektecan, pli seriozan organizajhon, kiu reale progresigos kaj
  popularigos Esperanton.
  Kaj se la gvidantoj ofendighas pro miaj akraj vortoj, tio nur signifas, ke
  ili pensas ne pri la afero, kiun ili devas gvidi lau plej bona maniero, sed
  unuavice pri si mem. Ankau ofendighemo estas infaneca emo.
  Antau 3 jaroj mi skribis al A.G. kaj G.K. (fakte, li aperis en la Reto pli
  poste) tre amike. Sed mi chiam kunpushighis kun ilia fiereco, nedeziro kaj
  neinteresiteco fari ion utilan, kun iliaj ambicioj... A.G. multfoje ofendis
  min, asertante ke mi skribas nur por altiri al mi atenton; li nomis miajn
  leterojn "fekajhoj" ktp. Gudskov, kiu havas marginalajn politikajn ideojn
  kaj samtempe estas vicprezidanto de REU, plurfoje nomis min fashisto kaj
  chiel ajn. Du jarojn mi dedichis al unika dissendo "Shkola Esperanto" - dum
  60 jaroj en Rusio estis nenio simila, kaj "REGo" neniam menciis ghin, same
  kiel ne menciis miajn dissendojn "Homaranismo" kaj "Chto pishut ob
  esperanto". REU-estraro ne subtenas aktivajn e-istojn, ech vidas en ili
  "konkurantojn". Chu ni povas fidi al tiuj personoj, chu ni povas esperi, ke
  ili iam ajn progresigos Esperanton? Ne!
  
  Chiu organizajho kaj sekto eldonas sian bultenon; sed chiu bulteno estas en
  popola lingvo. Niaj bultenoj estas en lingvo, kiun la popolo ne komprenas,
  jen nia sinmortiga eraro. Niaj bultenoj devas esti ruslingvaj au dulingvaj,
  aliokaze ni chiam restos sekto...
  
  Unue, necesus krei specialan dissendoliston, kiu estus malfermita redakciejo
  de nova jhurnalo. Tien oni povus sendi chiajn opiniojn, materialojn, utilajn
  ligilojn ktp. Se REU estus agokapabla, ghi povus vaste reklami tiun
  iniciaton, kaj laboro ekbolus. Sed chu ghi agos tiel? Mi ne kredas... Kaj se
  mi mem iniciatos ghin, do sekvos jhaluzo kaj bojkoto. REU mem ne iras en
  ghusta direkto kaj aliajn ne subtenas. Jen la problemo.

• Sendube, rusa kulturo estas senfine pli richa kaj interesa; sed tio tute ne
  estas kauzo por forlasi Esperanton. Tasko de rusaj e-istoj estas kiel eble
  pli multe traduki E-en, por diskonigi la rusan kulturon. Kaj pure Esperanta
  kulturo, lau mia opinio, ech tute ne bezonas ekzisti. Almenau por mi mem,
  pure E-a kulturo, forshirita de naciaj radikoj, ne estas interesa...

• Dum lastaj monatoj mi ankorau pli senrevighis pri esperantistaro. Tion
  influis kelkaj sinsekvaj eventoj. Unue, malgrau mia multjara laborado por
  Esperanto, unu E-lingva IDIOTO atakis min per plej kruelaj rusaj "mataj"
  vortoj, kaj NENIU esperantisto riprochis lin, neniu subtenis min. Due, unu
  anonima E-lingva KANAJLO (ne rusiano) kreis jam plurajn retpaghojn, speciale
  dedichitajn al mia persono, por kalumnii kaj chiel malkredindigi min. Trie,
  dum la lasta "REU"-"kongreso" oni elektis kiel prezidenton - s-ron XXX.
  kun kiu mi tre multe disputis en "esper-rus" kaj en aliaj lokoj.
  Lia elektigho signifas pluan stagnadon kaj putradon de Rusia E-movado dum
  baldauaj jaroj.
  
  Esperanto ne estas simple lingvo. Ni ne devas strebi al ghia kiom-ajn-kosta
  disvastigado, sendepende de spirita matureco de homoj. Jam sen tio en
  E-landon penetris tro multe da stultuloj, kiuj paralizis la movadon. Se
  Esperanto iam venkos, do ne dank'al, sed spite al esperantistoj!
  Mia nuna slogano estas: "Por Esperanto - sen esperantistoj"!
  
  Esperanto en manoj de stultuloj povas ighi ilo de detruado. Antau nelonge
  unu e-isto skribis en tiu senco, ke "Esperanto estas pli efika detruilo por
  Usono, ol chiuj teroristoj kune". Mi ne deziras partopreni la detruadon.
  Esperanto estas kreita ne por detruado, sed por konstruado. Kaj mi tute ne
  emas batali kontrau Usono kaj angla lingvo, ne emas defendadi Irakon pere de
  Esperanto ktp.

• S-ro Gudskov demandas:
  
  > 1. Celoj de E-movado en la tutmonda skalo. Kion, fin-fine, strebas
  > esperantistoj?
  > 2. Kion, konsiderante la gxeneralajn celojn de la novado, devas strebi
  > landaj movadoj kaj asocioj?
  > 3. Kian lokon devas okupi la rusia movado gxenerale kaj REU speciale?
  > 4. Kiaj etapoj de evoluo de la movado antauxvideblas gxenerale kaj en
  > Rusio speciale?
  > 5. Kiaj labordirektoj devas esti proritataj en tiuj etapoj?
  > 6. Kiuj konkretaj arangxoj (ekz., UK en Rusio) povas esti utilaj kaj
  > kiuj - malutilaj de la vidpunkto de la gxenerala strategia plano?
  > 7. Kia ideologio de la movado estas plej celkonscia konsiderante
  > gxeneralan strategian celon de la movado?
  
  Se s-ro Gudskov ne scias respondojn al tiuj demandoj, do kial li konsentis
  prezidentighi? Tasko de prezidento estas ne DEMANDADI, sed RESPONDADI.
  Prezidento gvidas, sed ne senhelpe petas konsilojn. Imagu, ke iu persono
  konsentis esti shoforo de autobuso kaj, sidighinte sur la shoforan sidlokon,
  demandas pasagherojn kien veturi!
  
  Se REU estus serioza organizajho, tiam la prezentitaj demandoj estus
  pridiskutitaj ANTAU la kongreso. Diversaj kandidatoj devus esti
  prezentintajn klarajn kaj diversajn programojn, kaj oni devus esti
  elektontaj inter la kandidatoj lau iliaj programoj. Reale, kiel mi jam
  multfoje skribis, temas ne pri vera esperantista organizajho, sed pri
  kompanio de amikoj, kiu pretendas gvidadon de E-movado, ech se ilia
  "gvidado" malutilas al la movado.
  
  Interalie, la prezentitaj demandoj jam estis multe pridiskutataj en
  "esper-rus". Sed saghaj respondoj sinjoron Gudskov kaj liajn samkompanianojn
  ne interesas. Kiomfoje chi tie estis skribitaj interesaj ideoj, konkretaj
  konsiloj, valoraj planoj - kaj Gudskov estis unua, kiu furioze "pruvadis"
  ilian nerealigeblecon. Certe, kun nuna (kaj eterna) REU-estraro nenio estas
  realigebla...